QAA yn cyhoeddi mai'r Athro Isabel Donnelly yw eu Prif Weithredwr newydd

Mae'r Asiantaeth Sicrhau Ansawdd ar gyfer Addysg Uwch (QAA) yn falch iawn o gyhoeddi penodiad yr Athro Isabel Donnelly fel eu Prif Weithredwr nesaf, yn dilyn proses recriwtio agored a thrylwyr dan arweiniad Bwrdd QAA.  Bydd hi'n dechrau yn y rôl yn gynnar yn y flwyddyn newydd. 

Bydd yr Athro Donnelly yn ymuno â QAA o Ysgol Feddygaeth Drofannol Lerpwl, lle mae hi ar hyn o bryd yn Ddirprwy Is-Ganghellor dros Addysg. Mae hi wedi gwasanaethu’n flaenorol fel Cyfarwyddwr Ansawdd a Safonau yng Ngholeg Blackburn, Deon a Chyfarwyddwr Datblygu Busnes a Phartneriaeth ym Mhrifysgol Canolbarth Swydd Gaerhirfryn, a Phennaeth Datblygu Dysgu ac Addysgu ym Mhrifysgol Cumbria. Mae hi hefyd yn gwasanaethu ar hyn o bryd fel aelod o bwyllgor gweithredol y Grŵp Penaethiaid Datblygu Addysgol, ac fel aelod o fwrdd llywodraethwyr Coleg Cymunedol Knowsley a Choleg St Helens.  Mae hi wedi cynorthwyo â gwaith QAA fel adolygydd, ac fel darllenydd arbenigol ar gyfer Côd Ansawdd Addysg Uwch y DU. 

Mae ei gyrfa wedi cwmpasu'r sectorau addysg uwch ac addysg bellach, ac mae ganddi brofiad eang mewn meysydd gan gynnwys ansawdd a safonau, profiad myfyrwyr, rhyngwladoli ac addysg draws-wladol.    

Meddai Christian Brodie, Cadeirydd Bwrdd QAA: 

"Ar ran y Bwrdd, mae’n bleser gen i groesawu Isabel Donnelly fel Prif Weithredwr nesaf QAA, ar yr adeg hollbwysig hon i sector addysg drydyddol y DU. Mae hi'n dod â chyfuniad rhagorol o arweinyddiaeth strategol, gwybodaeth ddofn am y sector a phrofiad rhyngwladol, a fydd o wasanaeth eithriadol o dda i QAA, ein haelodau a'r sector. 

"Roedd hon yn broses gystadleuol iawn, ac roedd Isabel yn sefyll allan am ei hymagwedd at arwain a oedd yn canolbwyntio ar bobl a'i gwerthoedd cryf, yn ogystal â'i chyfoeth o arbenigedd a phrofiad perthnasol.  Rwy'n hyderus, o dan ei harweinyddiaeth, y bydd QAA yn parhau i dyfu o ran dylanwad ac effaith yn y DU ac yn fyd-eang. 

“Mae’r Bwrdd yn hynod ddiolchgar i Karl Leydecker am ei arweinyddiaeth feddylgar a llwyddiannus iawn fel Prif Weithredwr Dros-dro ers mis Ebrill.  Mae ei waith ochr-yn-ochr â'r tîm gweithredol wedi sicrhau bod QAA yn parhau i fod mewn sefyllfa gref ar gyfer eu pennod nesaf." 

Dywedodd Isabel Donnelly, darpar Brif Weithredwr QAA: 

“Rwyf wrth fy modd yn ymuno â QAA fel eu Prif Weithredwr nesaf, ac yn teimlo’n freintiedig i gael y cyfle i arwain sefydliad sy’n chwarae rhan mor bwysig ar draws addysg drydyddol y DU ac yn rhyngwladol. 

“Mae cryfder addysg drydyddol yn y DU yn dibynnu nid yn unig ar beth rydym yn ei gynnig, ond ar yr hyder y gall myfyrwyr a phartneriaid ei roi yn ansawdd a'i safonau’r addysg honno. Mae gan QAA ran bwysig i'w chwarae: gweithio mewn partneriaeth i amddiffyn safonau, cefnogi gwelliant a helpu'r sector i ymateb yn hyderus i'r cyfleoedd a'r heriau sydd o'n blaenau. 

“Rwy’n edrych ymlaen at weithio gyda thîm talentog QAA ac, yn bwysicach fyth, at wrando ar ein haelodau a’n partneriaid ledled y DU ac yn rhyngwladol. Rwyf am i ni adeiladu ar arbenigedd ac enw da sylweddol QAA, cydweithio ag eraill ar draws y sector, a sicrhau bod QAA yn parhau i fod yn berthnasol, yn ddibynadwy ac yn werthfawr i'r rhai y mae'n eu gwasanaethu.” 

Meddai'r Athro Karl Leydecker, sydd wedi gwasanaethu fel Prif Weithredwr Dros-dro ers mis Ebrill: 

"Mae wedi bod yn fraint arwain QAA yn ystod y cyfnod hwn, ac rwy'n falch o bopeth y mae'r tîm wedi'i gyflawni. Rwyf wrth fy modd â phenodiad Isabel, a gwn y bydd hi'n ymuno â sefydliad sy'n llawn cydweithwyr ymroddedig ac arbenigol, ynghyd ag aelodau cefnogol. Edrychaf ymlaen at gydweithio'n agos â hi i sicrhau trosglwyddiad llyfn." 

Bydd yr Athro Leydecker yn parhau fel Prif Weithredwr Dros-dro nes i'r Athro Donnelly ddechrau yn ei swydd.