Cerdyn post o'n Fforwm Cyrff PSR diweddaraf

Maureen McLaughlin
Pennaeth Prifysgolion a Safonau, QAA

Beth yw ystyr yr acronym Saesneg 'PSRB' (ni ddylid ei ddrysu gyda PBSR, y cerddor Sbaenaidd)? I'r rheiny ohonoch nad ydych yn gyfarwydd â'r term yma, mae'r cyrff proffesiynol, statudol a rheoleiddio (cyrff PSR) yn grŵp amrywiol sy'n cynnwys cyrff proffesiynol, cyrff rheoleiddio a'r rheiny sydd â'r awdurdod statudol dros broffesiwn penodol.

Mae cyrff PSR yn chwarae rôl yn y sector addysg uwch drwy gymeradwyo, cydnabod ac achredu rhaglenni addysg uwch. Nod ein digwyddiadau yw rhannu gwybodaeth ac arferion gorau, a thrafod materion a heriau cyfredol.

Y tro hwn, clywsom gan Lily Lipman a Dr Linda Prescott-Clements o Goleg Brenhinol y Milfeddygon (RCVS) am brofiad cathartig a grymusol eu hachrediad llwyddiannus diweddar gan Gymdeithas Sicrhau Ansawdd mewn Addysg Uwch Ewrop (ENQA). Roedd hi'n arbennig o anogol cael clywed am yr ysgogiad a roddodd hwn i wella ymgysylltiad y myfyrwyr drwy Goleg Brenhinol y Milfeddygon cyfan. Roedd hi'n bleser gan QAA gymryd rhan yn yr ymarfer hwn fel un o'r rhanddeiliaid allanol.

Yn nes ymlaen, aeth Zara Green, Rheolwr y Ganolfan Cymwysterau Proffesiynol yn NARIC y DU, ati i rannu ystyriaethau amserol ar oblygiadau Brexit i gydnabyddiaeth broffesiynol. Clywsom am wahanol effeithiau Brexit (p'un a chafwyd cytundeb ai peidio), heriau'r ddwy sefyllfa, yn ogystal â'r camau a gymerwyd yn barod i roi systemau ar waith i sicrhau bod y Deyrnas Unedig yn cynnal perthnasoedd cadarnhaol.

Clywsom hefyd gan Alan Jones, darpar Lywydd Sefydliad Brenhinol Penseiri Prydain (RIBA), a drafododd ofynion, pwysau a blaenoriaethau'r sector addysg uwch a phroffesiwn y penseiri yn y DU. Cawsom ein herio gan Alan hefyd i wneud y defnydd gorau posib o Ddatganiadau Meincnodi Pwnc fel grym positif ar gyfer cynnal safonau uchel.

Yn y digwyddiad hwn, aethom ati i siarad am ystod o ddatblygiadau sy'n effeithio ar QAA, gan gynnwys effaith cael ei dewis fel y corff sicrhau ansawdd dynodedig i Loegr, ein symudiad sydd ar y gweill tuag at fodel aelodaeth, ein gwaith i gefnogi addysg uwch mewn prentisiaethau a phwysigrwydd cynyddol llais y prentis mewn perthynas â sicrhau ansawdd y ddarpariaeth, a'r gwaith arfaethedig ar Ddatganiadau Meincnodi Pwnc.

Mae'r Fforwm Cyrff PSR yn blatfform rhagorol i gyfnewid gwybodaeth ac, mewn digwyddiadau blaenorol, ymunwyd â ni gan gydweithwyr o sefydliadau eraill neu adrannau eraill y llywodraeth, oedd yn ceisio barn cymuned y cyrff PSR am ddatblygiadau pwysig mewn polisïau. Rydym hefyd wedi ffurfio perthynas waith gadarnhaol gyda Rhwydwaith Ymchwil y Cymdeithasau Proffesiynol (PARN), sef sefydliad aelodaeth i gyrff proffesiynol, sy'n cynnig ei arbenigedd a'i farn am faterion allweddol yn y sector trwy lens ymchwil, rhwydweithio a hyfforddi.

Mae'r Fforwm yn parhau i dywys y rheiny sydd â diddordeb yn rôl bositif y cyrff PSR yn nhirlun sicrhau ansawdd addysg uwch y DU, yng nghyfnewidiad y dirnadaethau am yr heriau sy'n ein wynebu ni i gyd, a'r arferion da a ddatblygwyd.

Rydym yn bwriadu cynnal ein digwyddiad nesaf ym mis Tachwedd 2019, a byddwn yn datblygu'r agenda nesaf ar y cyd gyda'n cydweithwyr mewn cyrff PSR dros y misoedd nesaf. Os hoffech ragor o wybodaeth am ein Fforymau, mae croeso i chi gysylltu ag Amy Spencer yn QAA