Yr Athro Simon Gaskell yw Cadeirydd Bwrdd QAA. Mae ganddo raddau o Brifysgol Bryste ac mae wedi cael gyrfa academaidd (gyda llawer o gysylltiadau diwydiannol), yn y DU ac yn UDA. Ar ôl treulio nifer o flynyddoedd yng Ngholeg Meddygaeth Baylor yn Houston, Texas, daeth yn ei ôl i'r DU i gymryd cadair athro mewn sbectrometreg màs yn Athrofa Gwyddoniaeth a Thechnoleg Prifysgol Manceinion (UMIST) gynt. Mae wedi ymroi ei yrfa ym maes ymchwil i'r defnydd o dechnegau cemegol ffisegol i ddatrys problemau yn y gwyddorau biofeddygol. Cymerodd ran agos yn y broses o gyfuno UMIST a Phrifysgol Fictoria Manceinion (2002-04), ac wedi hynny daeth yn Is-lywydd Ymchwil.

Yn 2009, penodwyd yr Athro Gaskell yn Llywydd a Phennaeth Prifysgol y Frenhines Mary, Prifysgol Llundain. Yn 2012, cychwynnodd ddau dymor fel aelod etholedig o fwrdd gweithredol Prifysgolion y DU, ac fel Trysorydd y gymdeithas hon. Bu'n gwasanaethu fel Cadeirydd yr Asiantaeth Ystadegau Addysg Uwch rhwng 2013 a 2017. Yn 2017, ymddeolodd o'i swyddi llawn amser.

Cysylltiadau cyfredol â sefydliadau addysg uwch (ac eithrio gwaith cyflogedig):

Athro er anrhydedd ym Mhrifysgol Manceinion; aelod o gorff llywodraethu Prifysgol Plymouth, Cadeirydd Grŵp Llywio'r Tirlun Data (o dan nawdd Asiantaeth Ystadegau Addysg Uwch y DU)

Cysylltiadau â chyrff proffesiynol a chyrff pwnc-benodol:

Aelod o fyrddau cynghori Halpin Partnership a'r Gymdeithas Gemeg Frenhinol

Cysylltiadau â chyrff eraill:

Dim

Yr Athro Nic Beech yw Is-Ganghellor Prifysgol Middlesex, a chyn hynny roedd yn Is-Bennaeth ym Mhrifysgol St Andrews a Phrofost Prifysgol Dundee.

Nic yw Llywydd Academi Rheolaeth Prydain a Thrysorydd Mygedol Academi'r Gwyddorau Cymdeithasol. Mae ei waith ymchwil yn canolbwyntio ar hunaniaeth, amrywiaeth, arwain newidiadau, a dysgu, ac mae wedi gweithio'n eang â'r diwydiant, yn benodol y diwydiannau creadigol ac iechyd. Mae wyth llyfr Nic yn cynnwys: Managing Creativity (Caergrawnt, 2010), Organising Music (Caergrawnt, 2015), Managing Change (Caergrawnt, 2017) ac Impact in Business and Management Research (Routledge, 2021).

Mae Nic wedi bod yn Athro Gwadd yn y DU, yr Iseldiroedd ac Awstralia, ac mae'n Gymrawd neu Gymrodor Academi Rheolaeth Prydain, Academi'r Gwyddorau Cymdeithasol, Cymdeithas Frenhinol y Celfyddydau, y Sefydliad Rheolaeth Siartredig, y Sefydliad Siartredig Personél a Datblygu ac Academi Rheolaeth Awstralia a Seland Newydd.

Cysylltiadau cyfredol â sefydliadau addysg uwch (ac eithrio gwaith cyflogedig):

Dim

Cysylltiadau â chyrff proffesiynol a chyrff pwnc-benodol:

Aelod o fwrdd London Higher, Cadeirydd AccessHE

Cysylltiadau â chyrff eraill:

Academi Rheolaeth Prydain, Academi'r Gwyddorau Cymdeithasol, y Sefydliad Siartredig Personél a Datblygu, Cymdeithas Frenhinol y Celfyddydau

Mae Chloe wedi bod yn Is-lywydd (Addysg Uwch) Undeb Cenedlaethol y Myfyrwyr (UCM) ers mis Gorffennaf 2022. Ei phrif rôl yw cynrychioli myfyrwyr addysg uwch ac eirioli ac ymgyrchu er eu budd a'u lles. Cyn ei chyfnod yn UCM, treuliodd Chloe ddwy flynedd yn gweithio fel swyddog myfyrwyr yn Urdd y Myfyrwyr Lerpwl.

Cysylltiadau cyfredol â sefydliadau addysg uwch (ac eithrio gwaith cyflogedig):

Prifysgol Newcastle

Cysylltiadau â chyrff proffesiynol a chyrff pwnc-benodol:

Aelod o fwrdd Swyddfa'r Dyfarnwr Annibynnol Addysg Uwch

Yr Athro Rachid Hourizi yw Cyfarwyddwr yr Institute of Coding (IoC) ers ei lansio ym mis Ionawr 2018. Mae'r IoC yn gydweithrediad cenedlaethol llwyddiannus rhwng mwy na 300 o gyflogwyr a 35 o brifysgolion sy'n gweithio gyda'i gilydd i weddnewid addysg uwch a darparu cyrsiau a rhaglenni newydd i ddatblygu sgiliau digidol er mwyn helpu mwy o ddysgwyr o gefndiroedd mwy amrywiol i fynd i mewn i yrfaoedd ym maes technoleg. Trwy ei ymgysylltiad arobryn a chynhwysol â dysgwyr, mae'r IoC wedi cofrestru 900,000 o ddysgwyr o gefndiroedd amrywiol hyd yn hyn. Cyn ei rôl bresennol, bu Rachid yn gweithio am ddeng mlynedd fel masnachwr nwyddau ac ar y marchnadoedd ariannol yn Llundain, Paris, Genefa ac UDA, cyn iddo gymryd ei swydd gyntaf ym Mhrifysgol Caerfaddon.

Richard Khaldi yw Cyfarwyddwr y Siambr ar gyfer Siambrau Maitland, un o siambrau Bargyfreithwyr amlycaf y DU.

Astudiodd Richard y gyfraith yng Nghaergrawnt a dechreuodd ei yrfa yn gweithio fel cyfreithiwr llys yn Ninas Llundain. Gan adael practis preifat yn 2005, treuliodd Richard dros ddegawd yn gweithio i Lywodraeth yr Alban a Llywodraeth y DU fel rheoleiddiwr economaidd yn y sector dŵr, yn ddiweddarach fel Uwch Was Sifil ac aelod o Fwrdd Ofwat. Yn ystod ei gyfnod gyda’r Llywodraeth, astudiodd Richard yn rhan-amser hefyd ac yn 2011 dyfarnwyd MBA iddo gan Ysgol Fusnes Booth, Prifysgol Chicago.

Gadawodd Richard y Llywodraeth yn 2017 a daeth yn Gyfarwyddwr gyda PA Consulting, sef cwmni ymgynghori ym maes arloesedd a thrawsnewid, gan weithio gyda chleientiaid yn y sector preifat a chyhoeddus. Ymunodd Richard â Siambrau Maitland ar ddechrau 2020 i ddod â’i yrfa mewn cylch llawn, gan weithio ochr-yn-ochr â bargyfreithwyr yr oedd yn arfer eu cyfarwyddo pan oedd mewn practis preifat. 

Mae Xenia Levantis yn astudio ar lefel ôl-raddedig ym Mhrifysgol Bryste, lle mae wrthi'n cwblhau gradd PhD 1+3 mewn Polisi Cymdeithasol a ariennir gan y Cyngor Ymchwil Economaidd a Chymdeithasol. Mae ei gwaith ymchwil yn archwilio cyd-ddatblygu polisïau yng nghyd-destun addysg uwch. Mae Xenia yn un o Ymddiriedolwyr Undeb y Myfyrwyr Prifysgol Bryste ac yn Gyn-lywydd Undeb y Myfyrwyr Prifysgol y Celfyddydau Norwich. Hi oedd Cadeirydd rhwydwaith myfyrwyr GuildHE ac roedd hi'n aelod o banel myfyrwyr y Swyddfa Myfyrwyr. Hefyd, cymerodd ran yng nghynlluniau peilot y Fframwaith Rhagoriaeth Addysgu fesul maes astudio fel cynrychiolydd myfyrwyr ar Banel y Celfyddydau.

Mae'r Athro Karl Leydecker FRSE wedi bod yn Uwch-Is-Bennaeth ym Mhrifysgol Aberdeen ers mis Mawrth 2019. Cyn hynny, roedd yn Is-Bennaeth (Dysgu ac Addysgu) ym Mhrifysgol Dundee. Mae ganddo gefndir academaidd mewn Almaeneg a Llenyddiaeth Gymharol.

Penodwyd Karl gan y sector addysg uwch yn yr Alban i arwain Thema Gwelliant QAA Scotland ar gyfer 2017-20 dan y teitl 'Tystiolaeth ar gyfer Gwelliant: Gwella Profiad y Myfyrwyr', a bu'n gwasanaethu ar amrywiaeth o bwyllgorau yn yr Alban a'r DU yn ymwneud â sicrhau ansawdd, gwella ansawdd a gwybodaeth i fyfyrwyr.

Yn ddiweddar, bu Karl yn gwasanaethu fel aelod o'r Tasglu Dyfodol Addysg Uwch yn Academi Frenhinol Iwerddon, ac roedd yn aelod o Grŵp Dyfodol Addysg Drydyddol yng Nghymdeithas Frenhinol Caeredin.

Cysylltiadau cyfredol â sefydliadau addysg uwch (ac eithrio gwaith cyflogedig):

Mae ei ferch yn astudio yng Ngholeg Cerdd Brenhinol y Gogledd ym Manceinion. Mae ei chwaer yn aelod o Gyngor Prifysgol Nottingham.

Cysylltiadau â chyrff eraill:

Cymrawd Cymdeithas Frenhinol Caeredin.

Mae'r Athro Sue Rigby wedi bod yn Is-Ganghellor Prifysgol Sba Caerfaddon ers mis Ionawr 2018. Cyn hynny, roedd hi'n Ddirprwy Is-Ganghellor (Datblygiad Myfyrwyr) ym Mhrifysgol Lincoln lle'r oedd hi'n gyfrifol am daith astudio'r myfyrwyr, o'r cam ymgeisio cyntaf hyd eu cysylltiadau fel cyn-fyfyrwyr.

Bu Sue yn gweithio fel paleontolegydd ym Mhrifysgol Caergrawnt, Prifysgol Caerlŷr a Phrifysgol Caeredin, cyn iddi ddod yn Bennaeth Cynorthwyol, ac yna Is-Bennaeth ym Mhrifysgol Caeredin.

Bu Sue yn arwain llinyn gwaith Datblygiad Cynhwysol y Grŵp Arweiniol Sector Myfyrwyr ag Anableddau yn Adran Busnes, Arloesi a Sgiliau Llywodraeth y DU. Yn ogystal, bu'n arwain gwaith Cyngor Cyllido Addysg Uwch Lloegr i ddiffinio anghenion gwybodaeth y myfyrwyr ôl-raddedig a addysgir.

Ar lefel ryngwladol, mae Sue wedi cyfrannu at waith y rhwydwaith Universitas 21 (U21) i ddatblygu prosesau o gydnabod a gwobrwyo staff ym meysydd dysgu ac addysgu, ac mae wedi datblygu'r Cwrs Ar-lein Enfawr Agored (CAEA, neu MOOC) cyntaf i fyfyrwyr y prifysgolion U21.

Cysylltiadau cyfredol â sefydliadau addysg uwch (ac eithrio gwaith cyflogedig):

Mae ei mab yn astudio ym Mhrifysgol Caeredin ac mae ei gŵr yn gweithio yno hefyd fel academydd.

Cysylltiadau â chyrff proffesiynol a chyrff pwnc-benodol:

Ymddiriedolwr Student Minds

Cysylltiadau â chyrff eraill:

Aelod bwrdd gweithredol MillionPlus, aelod o Advance HE, GuildHE a Phrifysgolion y DU

Mae gan Dani Saghafi dros ddau ddegawd o brofiad mewn arwain gwaith ymchwiliol ym maes uno sefydliadau a chaffael, gan ddarparu datrysiadau ariannol a gweithredol i gleientiaid rhyngwladol. Mae hi'n ymwneud yn weithredol â rolau llywodraethiant, yn eistedd ar Gyngor Llywodraethu Cymdeithas y Cyfrifwyr Ardystiedig Siartredig (ACCA). Mae hi hefyd yn aelod o Bwyllgor Technegol Cyfadran Gyllid Sefydliad y Cyfrifwyr Siartredig yng Nghymru a Lloegr (ICAEW), gan gyfrannu at bolisi cenedlaethol a datblygu safonau.

Mae Dani yn Gymrawd Gyfrifydd Ardystiedig Siartredig, ac mae’n gwasanaethu ar y Senedd ac fel Athro Cyswllt ym Mhrifysgol Brunel, Llundain.

Mae'r Athro John Sawkins yn Ddirprwy Is-Ganghellor/Dirprwy Bennaeth (Dysgu ac Addysgu) ym Mhrifysgol Heriot-Watt.

Mae ganddo gefndir fel economegydd â diddordebau ymchwil yn rheoleiddiad economaidd y diwydiant dŵr, gyda chyfeiriad penodol at brisiau, fforddiadwyedd a dyled dŵr. Mae wedi gwasanaethu fel aelod o gyrff cwsmeriaid y diwydiant dŵr ac mae wedi cynghori cyrff rheoleiddio economaidd yn yr Alban a gweddill y DU.

Ar hyn o bryd, mae John yn gyfrifol am arwain a gweithredu'r strategaeth dysgu ac addysgu, ac am sicrhau a gwella ansawdd academaidd ym Mhrifysgol Heriot-Watt gyfan. Mae ei brofiad ym maes sicrhau ansawdd yn allanol yn cynnwys gweithio fel adolygwr i QAA Scotland mewn Adolygiadau Sefydliadol i Sicrhau Gwelliant.

Cysylltiadau cyfredol â sefydliadau addysg uwch (ac eithrio gwaith cyflogedig):

Mae ei blant yn astudio ym Mhrifysgol Caeredin.

Cysylltiadau â chyrff proffesiynol a chyrff pwnc-benodol:

Aelod o'r Pwyllgor Sefydlog Asesu Ansawdd i'r DU, Cymrawd yr Academi Addysg Uwch

Cysylltiadau â chyrff eraill:

Ymddiriedolwr-gyfarwyddwr Eglwys Fethodistaidd Dinas Caeredin, aelod o Gymdeithas Beibl yr Alban

Mae'r Athro Oliver Turnbull yn Ddirprwy Is-Ganghellor ac Athro mewn Niwroseicoleg ym Mhrifysgol Bangor. Mae ganddo ddiddordeb arbennig mewn gwella ansawdd yr addysgu. Arweiniodd gais y Brifysgol i'r Fframwaith Rhagoriaeth Addysgu yn 2017 a'r Adolygiad Gwella Ansawdd o'r Brifysgol a gafwyd gan QAA yn 2018, a bu'n goruchwylio mesuriadau o foddhad myfyrwyr y Brifysgol yn yr Arolwg Cenedlaethol o Fyfyrwyr.

Mae'r Athro Turnbull yn niwroseicolegydd, ac mae ganddo ddiddordeb mewn emosiwn a'i ganlyniadau lu i'r bywyd meddyliol. Mae hefyd yn glinigwr, sy'n gweithio gyda chleifion niwrolegol a niwrolawfeddygol, yn enwedig y rhai sydd wedi dioddef damwain gerebrofasgwlar (strôc). Mae ei ddiddordebau gwyddonol yn cynnwys: dysgu sydd wedi ei seilio ar emosiwn; rôl emosiwn mewn credoau rhithiol; niwrowyddoniaeth seicotherapi; rheoli'r emosiwn a chadw rheolaeth arno; a'r cof emosiynol, a'i ddiogelu hyd yn oed mewn amnesia difrifol. Mae wedi ysgrifennu tua 150 o erthyglau gwyddonol ar y pynciau hyn, ac mae'n un o awduron y llyfr gwyddoniaeth boblogaidd 'The Brain and the Inner World'.

Cysylltiadau cyfredol â sefydliadau addysg uwch (ac eithrio gwaith cyflogedig):

Mae ei ferch yn astudio ar lefel israddedig ym Mhrifysgol Caerdydd.

Cysylltiadau â chyrff proffesiynol a chyrff pwnc-benodol:

Cadeirydd yr Ymddiriedolaeth Niwroseicoleg

Cysylltiadau â chyrff eraill:

Cymdeithas Seicolegol Prydain, y Cyngor Proffesiynau Gofal Iechyd